بسم الله الرحمن الرحيم ..

السلام عليكم ورحمة الله وبركاته ..

كيفكم ؟

هذه قصة كتبتها وكل شوي أزيد فيها .. عاد صارت طويلة ..

بدايةً ...

حياكم الله وبياكم وجعل الجنة مثوانا ومثواكم ..

(كان بودي لو أنزلتها بالبوح لكن من شروط الكتابة باللغة العربية الفصحى ..
ولحاجة في نفسي آثرت أن أنزلها باللهجة العامية .. )

آمل أن تحوز على رضاكم و وأن نخرج منها لوبفائدة واحدة ..
للمعلومية ستعرض هنا من باب الترفيه والفائدة إن شاء الله ..
قبل أبدا ..

(الحقوق محفوظة ولا أبيح نقلها لأي مكان قبل أخذ الإذن مني ..)

مد خ ــل ...
هناك أناس قربهم دفء .. نتلمس الآمان في أحضانهم .. نحبهم و نبذل النفيس ونؤثر راحتنا لنبقى بجوارهم ....

.. بعد ما صلوا العشاء كانوا عيال ناصر اللي هو أبو جواهر متواعدين يروحون للمكتبة مع أخوهم أحمد حتى يشترون بعض أغراض المدرسة.. وجواهر تدور مراجع لبحثها ..

عائلة أبو جواهر مكونة من أحمد و عبد الله وهاجر البنت الكبيرة بعدها وجواهر ومريم وهدى وخلود وفهد الصغير..

راحت جواهر ومعها أخواتها هدى وخلود..

تجولوا بالمكتبة وجلسوا يفرفرون فيها .. بس ما انتبهوا كان بالمكتبة فيصل ولد عمتهم هند .. وهو صديق أخوهم أحمد بعد كلهم في آخر سنة من الجامعة ..

شافهم من بعيد و عرفهم بخلود لأن توها صغيرة ما تتغطى وأحمد كان بالدور السفلي عند بعض الألعاب يلعب حتى يخلصون خواته ..

فيصل شاف خلود ومعها بنتين عرف أنهم بنات خاله ..

نزل تحت لقى أحمد جالس يلعب بالألعاب راح وقف جنبه وسلم عليه وسأله .. ليش أنت هنا قال له جاي بخواتي يبون المكتبة ..

زعق فيه فيصل : ومخليهم في الدور العلوي لحالهم .. ما يصير هذولا بنات وبحاجة لرقابه بعدين وين غيرتك ..

أحمد : بس هم فوق وبمكان عام وما أظن فيه أحد ممكن يسوي لهم شيء ..

فيصل يناظر بحقد وقال : رح عند خواتك لين يخلصون وإلا ترى با أعلم خالي ..

ناظره أحمد ببرود وقال إلا أنت كيف عرفتهم رد عليه يالذكي معهم أختك خلود فعرفتهم ..

أحمد: أووه ما شاء الله عليك .. مو المفروض غضيت بصرك يارجال..

فيصل : ....

أحمد : بعدين ايش جابك من الديرة .. اللي أعرفه بيتكم هناك أنت ايش جابك .. وإلا لازم بكل وقت أشوفك ..

فيصل: جاي أتمشى حسيت بالطفش هناك .. الليلة فيه زواج والبيت فاضي فجيت أتمشى وأشتري بعض الأغراض ولقيتكم هنا..

جلسوا يتكلمون شوي إلا هدى وخلود نازلين ولما قربوا من أحمد راحت له خلود تقول حنا خلصنا ..

سألهم عن أغراضهم ..

استاذن فيصل .. عزمه أحمد للعشاء لكنه اعتذر ..

وبعد عنهم وراح أحمد لخواته .. وبعد ما تحاسبوا طلعوا للسيارة ..

سبقتهم خلود وركبت قدام .. هدى وجواهر ركبوا وراء ..

أحمد: أقول احترمي اللي أكبر منك وارجعي وراء وخل جواهر تجي قدام ..

خلود : ماني نازلة وش بتسوي يعني .. يتهاوش معها يبي ينكد عليها ويزعلها ..

جواهر: لو يدري أبوي أنك مزعلها ترى بتندم .. خلها براحتها حرام هي صغيرة و ما أحب أتهاوش معها .. خصوصاً إن بيننا مصالح مشتركة ..

أحمد : الله أكبر .. أي مصالح ؟

جواهر : أنت ناسي إنها تروح لصديقتي لما أحتاج شي وتجيبه .. وبعد لاراحت مع الوالد للسوبر ماركت ماتنسانا.. أقول خلنا حبايب أحسن وترى هذي أشياء تافهة وما أحب أزاحم أحد فيها .. أركب قدام أو وراء عند الباب أو بالوسط ماتفرق معي أهم شي ألقى أحد يوصلني .. فديت نفسي قنوعة مو مثلكم .. إلا ايش رايكم أعشيكم على حسابي .. وأكسب فيكم معروف ..كلهم قالوا بصوات واحد ياليت ..

في الطريق سألت هدى أحمد من الرجال اللي كان واقف معك ..

رد أحمد هذا فيصل ولد هند ..

جواهر: من باب احترامها وتوقيراً لأبوي قل عمتي هند ..

أحمد: اسمع مين يتكلم .. لا يكون أنتِ منتي جواهر.. لو سمحتي أنت آخر من يتكلم .. نسيتي هواشاتك معها ..

جواهر: ولو نحترمها حتى لو كانت هي المخطية .. وبعدين أنت الثانية ليش ما غضيت بصرك عن الرجال ..

هدى : ما أدري شفته بجنب أحمد بعدين مو قصدي..

جواهر: أقول مرة ثانية لا تناظرين الرجال الرسول صلى الله عليه وسلم يقول : لا تتبع النظرة النظرة ، فإنما لك الأولى وليست لك الأخرى ..

هدى : أدري والنظرة سهم مسموم من سهام إبليس ..

أحمد: اللهم صل وسلم على محمد .. جواهر أنت مفروض دخلت قسم دعوة مو قسم علم النفس..

جواهر : الإنسان مهما كان قسمه أو تخصصه إذا شاف أحد ينصحه وهذا شيء مو خاص لقسم دون آخر .. فهمت يا أخوي ..

مروا للمطعم تعشوا بعدين رجعو للبيت.. لما دخلو البيت كان فيه صوت هواش بين أبوهم مع جدتهم .. تبي تروح لبيتها ..وهو يبيها تقعد وما تروح ..
كانوا تعبانين فدخلوا وعلى طول ناموا ..

من العصر باليوم الثاني جلست الجدة ملزمة .. تبي تروح لبيتها وصار نفس الازعاج والهواش مع أبو جواهر..

جواهر : يا سبحان الله .. حتى في إجازتنا ما نتهنى فيها.. صبرك يارب ما حبت تتدخل.. كانت تتكلم وهي معصبة .. صار صوتهم يعلى ..أخذت السماعات ووعلقتهم بأذآنها .. الحمد لله وأخذت تسمع للقرآن تبي أعصابها تهدى
كلما ارتفع صوتهم زادت على الصوت .. تمدت على السرير بعد نصف ساعة..

صار بيتهم هادي وما فيه صوت ازعاج .. طلعت بشويش تشوف إيش صار ..

كانت غرفة جدتهم قريبة من غرفتهم .. فتحت الباب بشويش وشافت جدتها تمسح دموعها ..

لمحتها جدتها ونادتها جواهر تعالي يابنتي اتصلي بعمك أبو عبد العزيز ..

راحت لها تو ماسكة الجوال إلا صوت أختها هاجر تقول لا تتصلين ترى أبوي نبه علينا ما نتصل على أحد ..

جواهر : بس جدتي زعلانه ونادتي أتصل .. يعني أردها ..

اتصلت وأعطت جدتها الجوال وكانت تضحك في نفسها لأنها اتصلت على رقم جوالها ..

ما أحد رد ناظرت الجدة جواهر بحزن ..

جواهر : ليش ياجدة يا حبيبتي ما تبين تقعدين عندنا .. كلنا نحبك ونبيك تجلسين على طول ..لا تروحين لبيتك .. هناك من يهتم فيك .. أنت ماليه البيت علينا اجلسي عندنا .. نسولف وياك .. وتوسعين صدرك عندنا .. وإلا ما عاد تبين تقعدين ببيتنا ..

هاجر : كلنا خدام لك بس أنتِ اجلسي ..هناك بتكونين لحالك وما في أحد بيجلس معك ..

الجدة : بروح لأهلي هناك عند جيراني أتصبح بالشمس وأجلس تحت الشجر .. مو هنا مسكر علي بين أربع جدران كني بسجن .. ميته أعصابي .. وعضامي جاها الوجع من هالبراد والمكيفات اللي عندكم ..

كانت الجدة توها طالعة من المستشفى من أسبوعين وأبو جواهر يبغاها تجلس عندهم يخدمونها وتكون تحت نظرة وحتى إذا صار شيء تكون تحت عيونه كان يحبها ويغليها.. وهي بعد تحبه وعياله وتفضلهم على باقي عيالها بسبب حسن تعاملهم معها .. وهي تحب جواهر بالخصوص من بين كل أحفادها لأنها سمتها على بنتها جواهر- الله يرحمها- اللي توفت بحادث .. وكان قلبها متعلق فيها وجواهر ولدت بعد الحادث بشهرين فسمتها عليها وبعد ما أمها جابت أختها مريم أخذتها جدتها عندها تربيها .. لأن أهلها ما يهتموا فيها كثيرا ودايم أخوانها يضربونها لما كانوا صغار فأخذتها تربيها وجلست عندها حتى دخلت المدرسة ورجعت تعيش عند أهلها..

وبعد الجدة تبغى تعوض فقد بنتها .. لما كانت جواهرصغيرة كانت تخبي لها بعض الحلوى إذا جاوها في بيتها وإذا أحد ضربها كانت تضربه فكانت جواهر مدلعة من جدتها .. وكانوا أحفادها يغارون منها .. خاصة سمية بنت عمتها منيرة كانت دايم تأذيها هي بمثل عمرها .. وكانت تغار كثير من تدليع جدتها لجواهر .. وسمية كانت بعد دلوعة (لأنها الوحيدة بين ستة أولاد) فهي تحب كل شي لها ودايم تنم بين جواهر وبين جدتها .. لكن الجدة تعرف أنها تكذب عليها وتعاقبها إما بكنس الحوش .. أو إنها تغسل ملابسها أو تحرمها إنها تطلع وتلعب البنات ..

جلست جواهرتكلم جدتها تبغاها تغير رأيها ما تروح لبيتها .. لكن رأس الجدة كان يابس ورفضت .. شوي إلا الجرس يرن .. دخل فهد يركض يقول جاء عبد العزيز ولد عمي أبوعبد العزيز..

كان أبوه وصاه يوصل بعض الأغراض لجدته بس درت إنه جاي خذت عصاتها ومشت بسرعة تبي تلحقه قبل يروح.. إلا أبو جواهر يدخل عليها يبيها ما تروح مع عبد العزيز بس هي رفضت وقالت بروح ولزمت فما لقى بد من إنه يوافق إنها تروح ..

ثم التفت على بناته اللي كانوا واقفين وقال يا جواهر روحي مع جدتك تحتاج مساعدتك روحي يابنتي وأنا أبوك ونسيها وساعديها .. واهتمي فيها ..

تفاجأت جواهر وصارت تتكلم بنفسها الحين بيت عمتي بدرية بجنب بيتهم وإن احتاجت شيء أكيد ما يقصرون وعمتي هند هناك وعمي أبو عبد العزيز وعمتي منيرة كل العائلة حوليها .. يعني مافي داعي أروح الله يهديك يايبه.. قطع أبوها حبل أفكارها وقال بسرعة جهزي شنطتك..

دخلت الجدة وأخذت عباتها وشال أبو جواهر شنطتها دخلت جواهرغرفتهم تكلم نفسها قالت لها هاجر: صدق بتروحين .. بأفقدك يا قلبي ..

جواهر : إيش أسوي .. هذا طلب الوالد وما أقدر أرد عليه..

هاجر : اصبري واحتسبي..

جواهر: "وعسى أن تكرهوا شيئاً وهو خير لكم " ..... الله يعيني على فرقاكم ..

شوي دخلت أم جواهر وجلست تنصحها تهتم بجدتها وأنها ما تزعلها وتهتم فيها وإن حست أنها تعبانه أو فيها شيء تتصل على أبوها .. جمعت شوي من ملابسها وراحت معهم ..

عبد العزيز ولد عمهم له إخوان بدر أصغر منه وهيفاء وتهاني بعدها ناصر بعده رغد كلهم يصيرون إخوان لجواهر من الرضاعة رضعت مع بدر..

عبد العزيز كان هادئ الى أبعد الحدود .. بمعنى بارد الأعصاب سلمت وركبت وراء جدتها..

كان بيت الجدة في ديرة يبعد عن الرياض ( تسمية مجازية ) تقريبا 90 كيلو .. وصلوا بيتها ( بيت الجدة نوع من البيوت الشعبية القديمة اللي يكون فتحه في داخل البيت فيه بعض الزرع ومصابيح فهو مفتوح من فوق .. أتمنى فهمتوا ) من دخلوه كان مرة متسخ والتراب مترامي في أطرافه والشجر ناثر أوراقه فيه .. جلست جواهر تفكر كيف ترتبه وكيف تبدا تغسله وتنظفه ..
يعني غير الغرف مليانة غبار بعد .. بس قالت اليوم خميس شوي إلا صوت الباب يطق راحت تفتح وكانت جدتها في غرفتها لما فتحت كان فيه حريم الديرة شافوا السيارة ودروا أن الجدة جات جاوا يسلمون عليها .. ويتحمدون بشفائها كانت غايبة عن الديرة تقريبا شهر ونصف حتى تعافت .. فتحت جواهر الباب وركضت لجدتها تقولها..

أسرعت الجدة للباب وقامت تهاوش جواهر ما فتحتي لهم .. مخليتهم واقفين على الباب .. آه منكم يابنات هاليوم .. ما تعرفون حق الضيافة تفضلوا اقلطوا الله يحييكم ..

كانت جواهر مستحية لأنهم حريم كبار وكثير وما تعرفهم ..

بعد المغرب جات العمة بدرية (وهي لها ثلاثة أولاد وأربع بنات أكبرهم نوف)

ومعها شغالتها وبناتها .. ساعدوا جواهر في تنظيف البيت ..

والحمد لله خلصوا وتعشوا بعدين العمة بدرية جلست توصي جواهر على الجدة ..

كانت جواهر مستانسة مع بنات عمتها وتعتبرهم مثل خواتها وهم قريبات منها كثير وتفضلهم على بنات عمتها هند اللي شوي ومتطبعين بطبايعها ومن سمية البنت الوحيدة لعمتها منيرة .. أما بنات عمها أبو عبد العزيز فهم أخواتها من الرضاعة فعلاقتهم ممتازة ..

قبل ما يمشوا طلبت جواهر من عمتها أنها تخلي نوف تجلس وتنام معها عند جدتها تونسها .. ووافقت ونبهت عليهم أنهم ينتبهوا لبعضهم وللجدة إن احتاجت شيء..

جلس جواهر ونوف يسولفون ويتسامرون لين نامت جدتهم وبعدين ناموا ..

... ... ...............................

في بيت أهل جواهر كلهم جالسين على العشاء وفهد يصيح يبي جواهر لأنها هي اللي توكله وتذاكر له وتهتم فيه أكثر من باقي خواته ..

أبو جواهر: خلاص اصبر الاسبوع الجاي نروح لجدتكم إن شاء الله .. ونشوف جواهر..

فهد : يمسح دموعه .. لا أبغى اليوم أشوفها .. ودوني ويكمل بكائه..

عبد الله : خلاص بكرة أوديك تشوفها ..

وفهد يصيح وما اقتنع بكلام عبدالله .. يناظره ثم يكمل بكائه ..

أحمد: تراك أزعجتنا من الصبح .. ليتني كنت فيه كان سفرتك معها خل نحس بالهدوء بالبيت ..

رمقته أمه بعينها وقالت: الله يخليها كانت ماليه علينا البيت ومن راحت أحس إني متشتته اليوم وبالي بالحيل مشغول عليها ..ناصر متى بترجع جواهر مو يكفي أختك بدرية بيتها جنبها ليش ما تنام عندها أو بناتها.. وتخلون جواهر تجي .. وجودها هناك ما له فايدة .. كان هذا بعد رأي باقي البنات .. بس الأب كان متضايق بعد ما راحت الجدة ويبي جواهر عندها حتى يتطمن عليها أكثر هي أو أختها هاجر ..

مر يوم الجمعة وليلة السبت اتصل أبو جواهر على جواهر يقول أن سواق الباص بيمرها يوديها للجامعة ويبيها تجهز بدري .. نوف راحت لبيتهم هي بثالث ثانوي ودراستهم شوي فيها صعوبة وما حبت تنشغل كثير..

نامت جواهر وقامت قبل الفجر تجهز للجامعة صلت الفجر بعد ما صلت نادتها جدتها ومدت بيدها فلوس ما حبت تزعلها فأخذتها .. جا الباص باست رأس جدتها وطلعت ركبت وكملت باقي الأذكار فيه .. بعد ما دخلت الجامعة تو تشيل عباتها إلا أختها هاجر تضرب ظهرها وتسلم عليها ومعها صديقتها..

جواهر : أهلا هاجر إلتفت عليها وحضنتها .. كيفكم ..

هاجر: الحمد لله .. البيت ولا شي بدونك .. ومن أمس والحالة صعبة ..

جواهر : طوال اليوم كنتوا على بالي .. إلا كيف دودي .. أمس كنت مشتاقة له حيل ..

هاجر: من رحتي وهو يبكي .. لا ويقول لأبوي ودني لها .. بصراحة شكله ينرحم ..

جواهر : لا تزيدين علي .. ليتني عندكم أحس إني بفراغ كبير وكاني ضايعة .. بس الحمدلله .. جات عمتي بدرية وبناتها وساعدوني ووسعوا صدري شوي ..
جلسوا يتكلمون شوي تمر بجنبهم سمية بينت عمتهم منيرة ومعها العنود بنت عمتهم هند وكانوا كلهم بقسم آخر بنفس مستوى جواهر ..

العنود : خل نسلم على بنات خالي ناصر ..

سمية : بعدين الحين بنمشي بسرعة .. باقي شوي على المحاضرة ..

كانت جواهر مشغولة مع أختها وما انتبهوا لهم .. شافتهم صديقة هاجر هذوليك مو بنات عمتكم ..

التفت جوهر : إيه هم بس ليش ما سلموا علينا هم اللي كانوا ما شين ..

هاجر : براحتهم .. بس لوكنت مارة بجنبهم كان سلمت ..

طبعاً جواهر بقسم علم النفس مستوى أول، مثل ماقلت من أول ..وهاجر باقي لها سنتين وتتخرج ..

اساذنوا من بعض وتواعدوا يتلاقوا بعد المحاضرة ..

جواهر : هاجر ألقاك بالمصلى اليوم المحاضرة بتلقيها لولو .. واحتمال أكون أنا .. لا تنسين تجين هناك

هاجر : إن شاء الله إن انتهت المحاضرة .. وما عندي شغل باجي مع صديقاتي ..

جواهر : على خير انتظركم ..

...... .................................................. ...........

يتبع

نحن لك متابعين

جزاك الله خيرا

و عليكم السلام ورحمة الله وبركاته

و بعـــد طول انتظار جاءت في وقتها ^_*

أنتظرتها ( :

و مقعد أول

اكملي جزاك الله خيرا متابعة بإذن الله

رجعت جواهر للبيت جدتها .. لقت عمتها بدرية مسوية الغدا ومرسلته فرحت وارتاحت شوي .. وهكذا طول الأيام

بيوم الخميس اجتمعوا أعمامها وعماتها ببيت جدتها ..

كانت صاحية من الصباح حتى ترتب البيت .. جاو بنات عمتها بدرية بدري حتى يساعدونها..

العصر وصلوا أهلها وكانت فرحانة .. سلمت عليهم وجلست تسولف معهم..

أحمد : حي الله المغتربة ..

شافه أبوه بطرف عين .. بلع كلامه ..

أم جواهر : والله لك فقده يابنتي وحضنتها .. كيف حالك إن شاء الله مرتاحة..

جواهر: الحمد لله الجلسة عند جدتي ما تتفوت .. تسلم لي كل كلامها نصايح وحكم.. بس تراها قرصتني لما فتحت الباب وشردت من الحريم ..

الجدة تبتسم : الله يخليك يابنيتي .. إلا أنت اللي ما شاء الله عليك الله يخليك لأهلك ما تقصرين ..اسمع ياناصر ترى راضية عنك بسبب جواهر .. الله يفرحني فيها قبل أموت..

أبو جواهر : ولو يايمة هذا حق وواجب وان شاء الله بعد طولت العمر .. وترى جواهر بنتك قبل تكون بنتي .. مو يكفي ربتيها .. وهذي هي ترد الجميل .. وأنا أفخر إنها متطبعه بطبايعك ..

الجدة : الله يوفقكم ويسعدكم ..

أحمد : بس جواهر اللي رضاك على أبوي بسببها وأنا وين رحت .. وإلا بس هي بنتك واحنا ما إحنا عيالك ..

الجدة: الله يخليكم كلكم خير وبركه .. وياولدي أنت ما تقصر كلك خير ...

باقي العايلة وصلوا بعد المغرب العمة هند ومنيرة وعائلة ابو عبد العزيز..

.. ...

كانوا البنات بجلسه بعيده عن الحريم .. يبون يستانسون أكثر ..

جلسوا يضحكون ويتسامرون ويرون ذكرياتهم أيام ما كانوا صغار في بيت جدتهم ..

هاجر : أذكر لما كنت صغيره لما نجي هنا كان بيت جدتي فيه أغنام ودجاج وكنا نخاف منهم وأذكر إن عيال عمتي هند يخوفونا بهم تذكرين يا جواهر لما العنود أخذت الدجاجة وصارت تلحقك بها ..

العنود: مين أنا لا ما أقدرأتذكر ....

جواهر : إلا أنا أتذكر كنتِ وأخوك ماجد ماسكينهم وتلاحقوني بهم وتضحكون حتى دخلت غرفة جدتي وجلست تهاوشكم

هاجر : هذاك اليوم أذكر إنك كنت بالليل ما نمتي من كثر ما كنتي مرتعبة من الدجاج..

العنود : عاد أحد يخاف من الدجاج ..

نوف : الحمد لله اعترفتي .. إيه نخاف منه مو مثلك متربية معه ..

العنود: ايش تقصدين.. يانوفه ..

نوف : موب حابة تدخل بمشاكل ما أقصد شي بس أقول جواهر كيف حياتك مع جدتي ..

جواهر : يوه يانوف .. يا بنات لو تعرفون كيف جدتي طيبة وأنا بجنبها أحسها تكون قريبة أكثر من لما يكون أبوي وأمي موجودين .. تصدقون كل يوم قبل أروح الجامعة تعطيني مصروفي .. لا وتوصيني أحياناً أشرب حليب على الصبح .. يعني تشعرني إني ماني وحيدة ..

سمية : أصلاً جدتي طيبة ومو محتاجة إن أحد يشهد لها بهذا..

جواهر : أنا أدري بس حبيت أبين جانب من طيبتها .. وهذا من حفظ المعروف ..

هيفاء : تصدقين جواهر إني أغبطك بقربك من جدتي .. يعني تهتمين فيها وتبرين بها وهذا يدل على طيب أخلاقك

جواهر : لا تنسين حبيبتي هيفاء ..إن الرسول صلى الله عليه وسلم قال : ليس منا من لم يرحم صغيرنا ويوقر كبيرنا ... ) الترمذي

جدتي كبيرة في السن ومحتاجه اللين والعطف والرحمة .. ونصيحة من كانت أعصابه مشتعله وما عنده بال طويل .. يحاول يتمالك أعصابه ويبردها وهو يتعامل مع كبار السن ويكثر من الحلم .. وبعدين هذا حق وواجب ..

تهاني : لا تنسون.. لولا الله ثم وجود جدتي كان ما اجتمعنا هذه الجلسة وصرنا أقارب .. يعني جدتي لها فضل كبير علينا والمفروض إنا نرد هالجميل ولو بالشيء القليل ..

نوف : كملي جواهر إيش بعد ..

جواهر: وكانت حاسة إن سمية متضايقة من كلامها .. بنات بعدين نكمل سيرة الكلام عن جدتي ..

نوف : جواهر .. أحس إني اليوم فيني طاقة أحب أفرغها فـ إش رايك الليلة نفرغها .. من حاب ينظم لنا ؟

سمية : وأنتِ بس بالعة راديوا ما تسكرين فمك ..

هيفاء : حرام عليك .. نوف كلامها زي العسل وما ينمل ..

نوف تناظر سمية ومو مهتمة من كلامها : تسلمين هيفاء كلك ذوق مو مثل البعض .. هاه جواهر إيش قلتي ...

جواهر: إن شاء الله .. بس خل نفكر ايش نسوي ..

هاجر: أنا معكم بس لا يكون تفريغها بشيء كايد ..

العنود: الحين أنتوا رايقين لـ هالحركات .. اعقلوا تراكم كبرتوا.. خلو اللعب هذا للبزارين ..

سمية: كانت لاوية بوزها وتطالعهم وما ترد ..

هيفاء : مو مهتمة بكلام العنود بسرعة قولي إيش هي خطتك .. بعدين إحنا تونا بزارين .. ايش رايك ياسيد معارض ..

وفاء : هذي في قانونها إنا كبرنا على هالحركات .. أقول ايش عندكم خل نفرح ..

جواهر: إحنا بنطلع فوق السطح تبون تجون معنا حياكم الله ما تبون براحتكم ..

وفاء : مو غاصبينكم ومو ملزمين عليكم ..

نوف: تكلم نفسها يارب مايجون ..

باقي البنات مؤيدين جواهر ويفكرون يسون شيء يونسون به أنفسهم.. قامت جواهر ومعها البنات ..

قاموا كل بنات عمتهم بدرية وأخوات جواهر و نوال بنت عمتهم هند لكن العنود قالت نوال اجلسي وخلك عاقلة جلست غصب لكن أختها وفاء ما سمعت كلامها وراحت معهم .. سمية جلست مع العنود ونوال ..

أخذتهم جواهر وطلعوا فوق السطح ..

كان القمر باقي يكتمل والجو جميل ونسائم الهواء كانت عليلة جلسوا يلعبون ..

مرة كل وحدة تألف بيت من القصيدة .. أو وحد تطرح سؤال أو ألغاز أحياننا تتعالى الضحكات وكانوا مستانسين .. ومرة يلعبون سباق جري .. ولعبوا شد الحبل وكانوا يسوون صوت لما يفوزوا وكانت ليلة جميلة جدا لعبوا إلى أن تعبوا ..

عكس البنات اللي تحت العنود وعبير ونوال اللي شافتهم عمتهم بدرية فاضيين وخلتهم ينظفون البيت لأنه محتاس من البزارين .. ويساعدون الشغالات في غسل الصحون.. ( يستاهلون : )

سمية :إحنا جايين ننبسط وإلا ننظف ونكرف .. أف

العنود : بناتها يلعبون فوق واحنا اللي نشتغل ..

اتصلت سمية بأمها تبي تروح لبيتهم راحت وجلست العنود ونوال لحالهم ..

قالت نوال أنا بأطلع فوق مع البنات إذا حابة تجين ..

لكن هذا بياثرعلى كبريائها فرفضت .. جلسوا يلعبون فوق وبحكم إن بكرة خميس والكل بينام ببيت الجدة طولوا السهر .. وقبل الفجر بنصف ساعة وقفوا اللعب وقالت جواهر خل نصلي ركعتين .. قبل الأذان واللي ماعليها صلاة تدعي وتستغفر بعدين نصلي الفجر وننام ..جاء يوم الجمعة وكل راح لبيته وجلست جواهر تستعد للجامعة ببيت جدتها ..

... ............. .............................

باليوم الثاني في بيت عمتهم هند جلسوا العائلة العنود ووفاء وفيصل وخالد ..

دخل عليهم سعود وكان هو أكبر عيال العمة هند سلم وجلس..

العمة هند : وأنت ما نشوفك إلا مرة باليوم وين كنت البارح .. جدتك وعمانك يسألون عنك؟

سعود : يمة إحنا باجازة يعني طالع مع ربعي أتمشى وأكشت معهم : )

العمة هند: مدري متى بتعقل .. ليش جمعتنا ما تعجبك ؟

ماجد : يمه زوجيه وتشوفين ..إذا تزوج عقل ..

سعود : أقول يا زينك ساكت وإذا بغيت أتزوج مو أنت اللي تقولي ..

العمة هند : ياولدي أخوك ما قال شي غلط .. ليتك تتزوج وتريحني من أشيل همك ..

سعود : يمه إذا هذي سواليفكم خلاص بأقوم أنام ..

العمة هند : الله يهديك بس .. أمس جدتك تسال عنك أنت من متى عنها؟

سعود: يووه أنسى أمرها أحيانا أصير مشغول خلاص .. إن شاء الله أمرها ..

فيصل : إيش هذا الشغل اللي ما يخليك تشوف جدتك .. تراها مسكينة ووحيدة ومحتاجة أحد يونسها ويحسسها إنه جنبها.. لو تفرغ نفسك شوي وتروح تسلم عليها وتوسع صدرها كان أحسن لك .. وتكسب بر فيها ..

سعود: يمه فكيني من عيالك .. جدتي أروح لها بالليل إن شاء الله ..

ماجد: إلا باسالكم أمس لما كنا ببيت جدتي كنا نسمع صوت ناس فوق لا يكون بيت جدتي فيه شيء..

العنود: الحمد لله هذي جواهر طالعة فوق ومعها باقي البنات .. ما لقوا لهم شغله غير هذا ..

وفاء : وهـ بس .. كان الجو حلو وجمعتنا تاخذ العقل ..لعبنا واستانسنا مو مثلكم معقدات أنفسنا قال إيش قال كبرنا وبنعقل ..

العنود :احترمي نفسك وهذا مو تعقيد هذا ثقل أجل تبينا مخفات مثلكم .. طايرين فوق السطوح تالي الليل ومقلقين المخاليق ..

فيصل : بس يازين اللعب والخفة.. شوي الواحد يرفه عن نفسه عقب زحمة الدراسة .. ويتهنى بشبابه مو تسوي الوحدة نفسها ثقيلة كأنها عجوز ما ديك على الكبر والعزلة والثقل .. ياعمة ..

وفاء : إيه مو هذي الله يسلمك العنود أختك وسمية .. بنت خالتي وإلا نسيت أن أمي تبي تزوجك هي .. بصراحة الله يعينك ..

ماجد: هذا كلامك قدامنا إذا خذتها أخاف تكملون حياتكم على الصامت.. عاد تخيل شكلك فيصل وأنت منطم ..

العنود :احترموا أنفسكم عاد .. ترى ما اسمح لكم .. واللعب خليناه لكم ارتحتي ..

فيصل : عاد انتي بالله معجبك وضعكم أمس أشك أنكم مستانسات .. تقولون بمجلس عزا..

وفاء: إلا ما شفت كيف هم ماسكين نوال معهم ورافضين أنها تجي معنا صدق ما عليهم شرهه ..

ماجد : نوال .. كيف صبرت عليهم وينها .. يناديها نوال ...

العنود : نفسي أعرف بس أنتم إيش شايفين في جواهر طويلة اللسان .. لا وتسوي نفسها خفيفة دم ..

وفاء :وأنا أبغى أعرف ليش أنتوا منقهرين منها .. شايفين فيها اللي ما لقينا فيكم فديتها خفة دم ورزان ..

العنود : ما شاء الله وتمدحينها نسيتي هواشها مع أمي ..

وفاء: بس من جد الحق مع من لما تتهاوش معها ؟ جاوبي نفسك ..

العمة هند: أقول بسكم عاد خلونا من سيرتها ، ما أحب أسمع طاريها ..

قام فيصل وطلع ..

قالت العنود : زعلتيه يمه تشتمين جواهر ..

العمة هند : أقول لو إيش يصير ما راح يا خذها ....

كان فيصل يبغى جواهر بنت خاله وقال لأمه لكنها رافضة وتنبي تزوجة من سمية ..

....................................

بالليل مر سعود بيت جدته وكان متصل على بدر يبيه يجي .. لأنه ما بغى يدخل البيت لحاله وحتى ما تتشره عليه الجدة.. ويبي بدر يخفف على جدته ..( بدر هو ولد أبو عبد العزيز وهو أخو جواهر من الرضاع .. وكان خفيف روح)

دخل بدر على جواهر :

جواهر : أنت إيش جايبك الحين وإلا تبي تورطني بعشاك..

الجدة : حي الله بدر .. جواهر عيب تقولين لأخوك هالكلام..

بدر : لا بس حبيت أسلم عليكم وأتطمن .. وبالمرة سمعت أن عندكم توزيعات ورث وجيت أخذ نصيبي وإلا بس كل شيء لجواهر..

الجدة : وش تقصد ياولدي ..

جواهر تتذكر : إيه أجل جيتك هذي مو صلة مثل ما تقول جاي مصلحة..

بدر : إيه مصلحة وإلا تبين تاخذين الفلوس كلها لك ..

الجدة : الحين أنتوا إيش تقولون ...

بدر : إيه ياجده ويسوي نفسه يبكي .. فلوسك حلال لجواهر حرام علينا ..

الجده : من قال ..

بدر : أنا أقول أجل كل يوم تعطينها مصروف .. ليش ملزومين بها ومتكفلين .. حتى ندفع لها هي عندها أبوها يعطيها ..

جواهر : جده خليك منه هذا ما وراه إلا الكلام الفاضي..

بدر : إيه كلام فاضي لهفي الفلوس عنا بس..

الجدة : ياولدي ليتك توضح ما فهمت عليك..

جواهر تضحك : هذا ياجده الله يحفظك .. ولدك هالمرجوج يبيك تعطينه مصروفه اليومي لمقصف المدرسة..

الجده : آها طيب اصبر خل أدور لك من هنا ....إلا هي تأخذ عصاها من ورى وتضرب بدر على ظهره

وقالت هذا نصيبك ..

بدر : مقبوله منك ياجده لكن عطيني هالعصاة أكسرها على ظهر جواهر ..

إلا الجرس يرن .. طلع بدر لقاه سعود ..

هلا وأخيرا جيت سنة أنتظرك .. وكان معاه عصاة جدته..

سعود : إيش فيك شايل العصا..

بدر : علشان أكسرها على ظهرك .. ليش تتأخر ..

سعود : ما اهتم بكلامه .. أحد في طريقي ..

بدر : لحظة أشوف .. دخل وقال لجواهر أنت روحي فيه ضيف جاي..

جواهر : من اللي جاي..

بدر : سعود ..

جواهر : الحين عيال عمتي هند ليش يجون بالتقطيع .. كل شوي جاي واحد ..

بدر : أقول روحي لأضربك بها العصا وسوي قهوة .. أجل تاخذين راتب يومي ببلاش..

طلعت جواهر ودخل سعود :

دخل وسلم على جدته اللي كانت زعلانه منه..

كيف حالك ياجده : ما ردت عليه ..

بدر : جدة سعود يقول وشلونك ..

الجدة : أدري وأسمع ..

بدر : طيب ليش ما ردتي عليه ..

الجدة : أنت مالك دخل ..

بدر : يهمس لسعود الظاهر إنك محتاج واسطه قوية وأظن إن واسطتي ما تنفع..

سعود : أقول ليتك تنقطني بسكاتك وتخليني أتفاهم معها ..جدة أنتِ زعلانه مني ؟

الجدة ما ردت عليه ..

سعود : جدة الله يخليك ردي علي .. والله إني كنت مشغول وما قدرت أجيك ..

بدر : بايش مشغول ؟

سعود : أقول ليتك تسكت .. وتخليني أتفاهم صح معها لأحذفك مع الدريشة...

بدر : بعد هذا جزاي جايبني واسطة.. وتتطاول علي قدام جدتي حبيبتي ..

سعود متضايق : جدة .. قلت لك أنا أعتذر وهذي حبت راس ..

الجدة : وليش تعتذر ما دمت بنظرك ما سويت شي خطا ليه تعتذر .. رح لربعك .. وكمل سهرك معهم أحسن من مقابلة وجهي .. من جيت لبيتي ما شفتك غير مرة وحده .. بالله وش اللي زايد فيك عن باقي إخوانك .. فيصل وماجد يمروني لو كل يومين .. وأنت لاحس ولا خبر على الأقل روح سلام مع أمك ..

سعود : ياجدة لا تتشرهين علي .. ترى قلبي يتقطع من تشرهك وما أتحمل أشوفك زعلانه مني .. و جيت الحين أسلم عليك وأطلب رضاك ..

الجدة : وش عقبه تجي عقب ما هاوشت أمك عليك .. أجل أحد يغيب عن جدته شهر ما تشوفه .. اللحين عرفت مكاني بقلبك .. لو كنت غالية كان كل أسبوع تمرني ..

بدريفتح فمه : شهر يالظالم .. عاد هذا اللي مسمينه على جدي الله يرحمه .. نبيه يتذكرك .. سعود المفروض يوميا تكون عندها خل تذكر المرحوم .. لكن شوفينا ما سميتونا عليه و كل يوم مرتزين عندك مو مثله .. جدة طلبتك كسري عصاك على ظهره تراه يستاهل وبردي كبدي : )..

سعود : بدر هذا بدل ما تكون وسيط خير تحرضها علي ..

الجدة : ما ترد وهي أصلا زعلانه منه ..

وهو جالس يبيها ترضى .. لكن كانت زعلانه حيل لما شاف ما فيه فايده تقهوى وجلس شوي بعدين طلع ..

وراح لامه وقال لها .. وردت عليه أمه تستاهل ما جاك..

.... .....................


يتبع : )